O kit Fotometrix de XuvenLab ten como obxectivo familiarizar o alumnado coa análise química e bioquímica utilizando unha ferramenta de amplo uso como é o fotómetro e aplicándoa á determinación analítica da proteína contida nun alimento. Fotometrix permite traballar a preparación de disolucións, a reacción de Lowry e aspectos relacionados co espectro da luz e a absorbancia. Contén un fotómetro e instrucións para elaborar unha recta de calibrado a partir de disolucións de concentración coñecida para determinar a concentración de proteína nunha mostra problema.
Con que alumnado se pode empregar?
- Materia de Física e Química de Secundaria e Bacharelato.
- Materia de Ciencias Xerais en Bacharelato.
- Materia de Tecnoloxía de Secundaria.
- Contidos transversais sobre educación alimentaria e saúde.
- Ciclos de Formación Profesional das familias da química e a industria alimentaria.
- Clubs de ciencias.
- STEMBach.
XuvenLab oferta diferentes opcións para traballar cos experimentos de Fotometrix:
1. Fotómetro Edu
FotometrixEdu é un fotómetro de luz visible que permite facer medidas da absorción de luz de tres cores en mostras transparentes. Está orientado ao uso didáctico en prácticas de investigación. O fotómetro está baseado nun microcontrolador tipo Arduino e a impresión 3D, e foi deseñado e construído de maneira que permita a realización de medidas de absorbancia coa precisión adecuada para mostrar os fundamentos da fotometría.
2. Método de Lowry
O método de Lowry é unha técnica fotométrica para medir a concentración de proteínas nunha disolución ou nun extracto biolóxico. Baséase no emprego de dous reactivos e na formación dun complexo coloreado da proteína presente na mostra ao engadir os reactivos, sendo a intensidade de cor proporcional á concentración de proteínas segundo a Lei de Lambert-Beer. Pódense utilizar diversos alimentos, mellor líquidos, como leite, zumes ou clara de ovo.
Que leva o kit?
- 10 tubos de mostras de 10 mL.
- Soporte para tubos.
- 5 bandexas para pesar.
- Balanza de precisión 500 g/0.01 g.
- 50 g de carbonato sódico anhidro.
- 50 g de sodio hidróxido (NaOH), lentellas.
- 10 g de cobre (II) sulfato anhidro, purísimo (sulfato cúprico).
- 10 g de potasio sodio tartarato.
- 35 g de leite en pó desnatado.
- 100 mL de reactivo de Folin-Ciocalteu (diluído ao 50%).
3. A práctica investigadora na aula
XuvenLan propón unha versión simplificada de FotometrixEdu baixo o nome de A práctica investigadora na aula. Neste formato simúlanse as disolucións patrón e as disolucións problema utilizando un colorante azul de características similares ao producido na reacción de Lowry. Esta proposta simplificada ten a vantaxe de que permite separar a aprendizaxe das fases da metodoloxía científica do uso de reaccións químicas para a cuantificación de analitos.
Hipótese
O punto de partida é a observación de que, actualmente, véndense nos supermercados diversos tipos de leite e de bebidas vexetais. Xorde entón a pregunta de se teñen todas o mesmo valor nutricional… Por exemplo, conteñen todas a mesma cantidade de proteína?
- O kit contén 10 tubos (10mL) de mostra coas disolucións patróns e coas disolucións problema.
- Tamén temos á venda unhas mostras de maior tamaño, tubos de 45mL.
